Прыгоды Мюнхаузена (1938)/1/Шалёная футра

← Воўк навыварат

Шалёная футра Апавяданьне Аўтар: Рудольф Эрых Распэ, Карней Чукоўскі 1938 год Арыгінальная назва: Die Abenteuer des Baron Münchhausen (1785)

Васьміногі заяц →

Прапануем да спампаваньня!

ШАЛЁНАЯ ФУТРА

Дарэчы, у маім жыцці былі падзеі і больш страшныя, чым сустрэча з ваўкамі.

Неяк раз у Пецербургу за мною пагнаўся шалёны сабака.

Я кінуўся ад яго наўцёкі.

Але на плячах у мяне была цяжкая футра, якая перашкаджала бегчы.

Я скінуў яе набягу, ускочыў у дом і зачыніў за сабою дзверы. Футра так і асталася на вуліцы.

Шалёны сабака накінуўся на футру і пачаў кусаць яе са злосцю. Мой слуга выбег з дому, падняў футру і павесіў яе ў той шафе, дзе вісела ўсё маё адзенне.

Назаўтра раненька слуга ўбягае ў маю спальню і крычыць спалоханым голасам:

— Уставайце! Уставайце! Ваша футра ашалела!

Я ўсхопліваюся з пасцелі, адчыняю шафу, і што-ж я бачу!? Усё маё адзенне парвана на шматочкі!

Слуга казаў праўду: мая бедная футра ашалела, бо ўчора яе пакусаў шалёны сабака.

Футра са злосцю накінулася на мой новы мундзір, і парвала яго ўшчэнт.

Я схапіў пісталет і стрэліў.

Шалёная футра ў момант заціхла. Тады я загадаў маім людзям звязаць яе і павесіць у асобнай шафе.

З таго часу яна ўжо нікога не кусала, і я надзяваў яе без ніякага страху.