ВУРАДНІК
Ну, што вы скажаце на гэта?
УСЕ
Нічога, ваша бродзіе!
МАЦЕЙКА
Ваша бродзіе! Ды тут усё ясна: мой тата прыстаў у прымы (паказваючы на КАЦЯРЫНКУ) да яе мамкі, а яе тата да маёй мамкі…
СОЦКІ
(паказваючы на Кацярынку)
А ты можа, верхалоз, хацеў-бы да яе ў прымы?
ВУРАДНІК
Ну, што, прымакі? Можа так і астаніцёся ў прымах?
МАКСІМ
Хай мяне бог крые! Усё роўна, як відаць, няма жонак на сьвеце бяз мешалак.
ТРАХІМ
Не хачу, ваша бродзіе! Мая цнотка добрая, а яго то мусіць і маю перагнала.
ПАЛАНЕЯ
Чымся з яе п‘яніцай век гараваць, дык лепш хай свой чалавек трэзвы астаецца.
ДАМІЦЭЛЯ
Які ён ёсьць стары, а ўсё такі ня тое, што новы.
МАКСІМ
Каб не Трахім, то нічога-б гэтага і ня было.
ТРАХІМ
Каб ня гэты Максім, то ўсё добра-б скончылася.
ПАЛАНЕЯ
Каб гэта шэльма, Даміцэля, хвастом ня круціла, дык мой ніколі-б мяне не мяняў.