Прыгоды Мюнхаузена (1938)/1/Пчаліны пастух і мядзведзі

← За валасы

Пчаліны пастух і мядзведзі Апавяданьне Аўтар: Рудольф Эрых Распэ, Карней Чукоўскі 1938 год Арыгінальная назва: Die Abenteuer des Baron Münchhausen (1785)

Першае падарожжа на месяц →

Прапануем да спампаваньня!

ПЧАЛІНЫ ПАСТУХ і МЯДЗВЕДЗІ

Але ні сіла, ні адвага не выратавалі мяне ад страшэннай бяды.

Аднаго разу ў час бою туркі акружылі мяне, і хоць я біўся, як тыгр, але ўсё-ж трапіў да іх у палон.

Яны звязалі мяне і прадалі ў няволю.

Для мяне пачаліся чорныя дні. Праўда, работу Мно давалі не цяжкую, але даволі сумную і надакучлівую: мяне прызначылі пчаліным пастухом. Кожнае раніцы я павінен быў выганяць султанавы пчолы на лужок, пасвіць іх увесь дзень, а ўвечары заганяць у вуллі.

Спачатку ўсё ішло добра, але вось неяк аднаго разу, пералічыўшы сваіх пчол, я заўважыў, што аднае нехапае.

Я пайшоў шукаць яе і хутка ўбачыў, што на яе напалі два велізарныя мядзведзі, якія, відаць, хацелі разарваць яе папалам і паласавацца яе салодкім мёдам.

У мяне не было з сабою ніякай зброі — толькі маленькі срэбраны тапорык.

Я размахнуўся і запусціў гэтым тапорыкам у крыважэрных звяроў, каб спужаць іх і вызваліць бедную пчолку. Мядзведзі кінуліся ўцякаць, і пчолка была выратавана. Але, на ліха, я не разлічыў размаху сваёй магутнай рукі і шпурнуў тапорык з такою сілай, што ён заляцеў на месяц. Так, на месяц.

Вы ківаеце галавою, сміецеся, а мне ў той час было не да смеху.

Я задумаўся. Што было рабіць? Дзе дастаць такую доўгую драбіну, каб дабрацца да самага месяца?