МУЗЫКА
Мы гэтага ня ўмеем.
АДОЛЬФ
Ну, дык падзі-спаць!
МУЗЫКА
Першы раз чуем.
АДОЛЬФ
А можа падзі-кварту знаеце?
МУЗЫКА
І гэта першы раз чуем.
ПАЎЛІНКА
(як-бы бядуючы)
А-ей-ей! Вось табе і на! Так і не наўчуся гэтых панскіх танцаў.
АДОЛЬФ
Не бядуйце вельмі. Я буду вытылінгіваць на язык, а васпанна толькі прыслухоўвайся ды вырабляй нагамі так, як і я.
ПАЎЛІНКА
Значыцца, будзем гуляць пад язык. (Сьмех. АДОЛЬФ іграе на язык і бяз толку выкручваецца з ПАЎЛІНКАЙ).
АДОЛЬФ
(паказваючы)
Вось так, вось так! Правую нагу сюды, а левую туды. Галава ў левы бок, а задам пад парог, ды вось так!.. Раз, два тры, то направа, то налева… (Усе прыглядаюцца да іх і сьмяюцца).
ЗЬЯВА IV
ТЫЯ-Ж І ПРАНЦІСЬ — АГАТА — СЬЦЯПАН
ПРАНЦІСЬ
(п‘яны)
Пахвалёны Ёзус. Вось-цо-да, пане дабрудзею.
КОЛЬКІ ГАЛАСОЎ
На векі! На векі!